Azərbaycan supermarket şəbəkəsi “Grandmart” Qazaxıstan bazarına daxil olur. Yaxın zamanda şəbəkənin Qazaxıstanın Aktau şəhərində 3000 kv. metrlik filialının açılışı olacaq.
Marja “Grandmart” şəbəkəsinin yaydığı məlumata istinadən xəbər verir ki, yerli bazarda fəaliyyətini uğurla davam etdirən “Grandmart” şəbəkəsi Azərbaycan məhsullarının xarici ölkə bazarlarında layiqincə təmsil olunması və Azərbaycan brendinin qlobal markaya çevrilməsi yolunda ilk addımlarını atır. Belə ki, yaxın zamanlarda “Grandmart” şəbəkəsi Qazaxıstanın Aktau şəhərində 3000 kv. metrlik filialının açılışı ilə pərakəndə markalarının yalnız ölkə daxilində deyil, ölkə sərhədlərindən kənarda da fəaliyyət göstərməsinə və Azərbaycan adının tanınmasına stimul olacaqdır.
Bu əlamətdar hadisə yalnız “Grandmart” supermarketlər şəbəkəsinin deyil, ümumən Azərbaycan pərakəndə sahəsinin uğurudur.
Layihənin həyata keçirilməsində əvəzsiz rol oynayanlar isə “Grandmart” şəbəkəsinin rəhbərləri Eşqin İsmayıllı və Turan Özbahcecidir.
Eşqin İsmayıllı – “Megastore” supermarketlər şəbəkəsinin qurucusu, eyni zamanda B2B və B2C sahəsində öncül layihələrdən sayılan “Bakumart Supply” şirkətinin təsisçisidir.
Turan Özbahceci – Türkiyəli iş adamı 2012-ci ildə Trakya bölgəsində olan 51 marketdən 21-nin İngiltərənin ən güclü pərakəndə qrupu olan “Tesco-Kipaya” satışını həyata keçirib, 2011-ci ildən “Araz” supermarketlər şəbəkəsinin qurucu ortağı və CEO-su olub, 2015-ci ildə isə Qafqazın ən böyük gurme və VİP mağazası olan Port Baku Bazarın açılışını reallaşdırıb.
Pərakəndə bazarının iki aparıcı lideri Eşqin İsmayıllı və Turan Özbahceci eyni layihədə bir araya gələrək Azərbaycan pərakəndə bazarının inkişafı üçün “Grandmart”, “Bolmart” və “Baqqal” layihələrində böyük uğurlara imza atıblar. “Bolmart” şəbəkəsi üzrə yalnız Bakı şəhərində deyil, respublikanın bir çox regionlarında müştərilərin tələbatlarının qarşılanması və bazarın yüksək səviyyədə təmin edilməsi ilə peşəkarlıq səviyyəsini genişləndirməyə nail olub. Bundan başqa “Grandmart” şəbəkəsinin “Səbət”, “Fresco”, “Avromart” marketlərini satınalması və həmin marketlərin rebrendinq edilərək Bakı şəhəri üzrə 32 filialda üstün xidmət anlayışı ilə “Grandmart” adı altında yenidən bazara təqdim edilməsi pərakəndə sektoruna yeni nəfəs gətirib.
